منتدى أيامنا • مشاهدة الموضوع - الملك المصري الذي حمي افريقيا من الاحلال وليس الاحتلال
      مرحبا بك عزيزي في منتدى أيامنا ، ندعوك إلى التسجيل في الموقع ، التسجيل مجاني و لن يأخذ من وقتك إلا دقائق قليلة . للتسجيل اضغط هنا
   

الملك المصري الذي حمي افريقيا من الاحلال وليس الاحتلال

جميع انواع المقالات الثقافية والفكرية

المشرف: الهيئة الادارية

الملك المصري الذي حمي افريقيا من الاحلال وليس الاحتلال

مشاركةالأحد سبتمبر 23, 2018 9:14 pm


صورة

كام سؤال ... على الماشي
أول سؤال هو .. مين الناس دول وإيه اللي بيجمعهم ؟؟ أنا متأكد إن معظم الأصدقاء عارفين أغلبية الناس دول إن ماكانش كلهم .. منهم الفنانين والرياضيين و الكتاب والزعماء و المناضلين , طب إيه اللي بيجمعهم ؟ اللي بيجمعهم كلهم هو إنتماءهم للقارة الأفريقية , سواء منهم المصريين أو المنتمين حاليا لدول تانية .. لكنهم كلهم نبعوا من قارة أفريقيا. اللي بيجمعهم كمان إنهم كلهم خللوا حياتنا أجمل وأمتع ومعيشة البشر أفضل .. من خلال جهودهم المضنية وإصرارهم على عمل شئ جيد .. سواء كان الشخص مناضل لتغيير حياة الناس للأفضل .. زي مانديللا أو مارتن لوثر كينج , أو رياضي بيعطي المثل في الإصرار والعزيمة والاخلاق .. زي محمد علي كلاي , أو فنان مبدع بيخلي حياتنا ثرية وممتعة و تستحق نعيشها .. زي عبدالحليم حافظ وأحمد زكي ومورجان فريمان ودانزيل واشنطن وديانا روس ومحمود مختار , أو مفكر نور حياتنا بفكره .. زي طه حسين أو أديب أمتعنا بكتاباته .. زي نجيب محفوظ .

طب إيه الصورة اللي فوق دي ؟ دي صورة تتويج جدنا الحر العظيم رعمس التالت .. حنلاقيه بيتوجه حر من على يمينه وسو من على شماله. وجود الإتنين دلالة على إن قدره كان صيانة السلام و خوض الحرب .. يعني التكليفات الأساسية لحاكم كمة . طب إيه علاقة الملك العظيم ده بالرموز الجميلة دي ؟ العلاقة في منتهى الخطورة والاهمية بس يلزمها سؤال تمهيدي .. العالم مليان نجوم في كل المجالات من أصول أفريقية .. لكن تقدر تفتكر رمز عالمي أو نجم أثر على البشرية زي دول من أصول أمريكية ؟؟ يعني زي مابيقولوا من الهنود الحمر ؟؟ لو عارف مش حتلاقي غير ناس نادرة جدا جدا .. طب عارف ليه ؟؟ الإجابة هيا مفتاح البوست ده .

الحكاية من البداية مصر قدرها دايما إنها تتصدى للتحديات الكبري اللي ممكن تهدد مصير الإنسانية كلها .. المضحك في الموضوع إن مصر دايما بتقوم بالدور ده وهيا في أسوأ أحوالها .. الكلام ده حصل مع الصليبيين والمغول .. لكن قبلها بكتير حصل مع الخطر الأعظم منهم .. الغزو الأوربي الأول لأفريقيا. من 3200 سنة تقريبا إنتقلت البشرية من العصر البرونزي للعصر الحديدي .. زي ماهيا في القرن الماضي بدأت في الإنتقال من العصر التناظري للرقمي. في الحالتين الإنتقال ده ماحصلش في كل المناطق بنفس الدرجة والكفاءة .. من 3200 سنة ، الشعوب اللي إمتلكت قوة الحديد وخصوصا في صناعة الأسلحة أصبحت الأقوى والاخطر على مستوى العالم وبدأت في الفتك بالأمم اللي لسة عايشة العصر البرونزي .. تماما زي الأمم المستقبلية حاليا .. الأمم بتاعت النانو والهندسة الوراثية والتطبيقات الكمومية ما حتفتك قريبا بالأمم الغبية المغيبة بتاعت السفه والمخدرات و عبده موتة. الأمم الحديدية دي سماها أجدادنا شعوب البحر لانهم كانوا بيهاجموا الأمم التانية غالبا من البحر. مع زحفهم على سواحل البحر المتوسط بدأوا في إبادة شعوب كتيرة ربما كان من أولها الجريج في ميكوناي وبعدهم أجهزوا على الإمبراطورية الحيثية وقضوا عليها .. وإنتقلوا للكنعانيين وخلصوا عليهم وأصبحوا على أبواب مصر. مصر وقتها كانت لسة خارجة من فوضى كبيرة في نهاية الأسرة 19 .. الفوضى اللي إنتهت بدخولها في الأسرة 20 على يد الملك سوناخت الشهير بستناخت. الملك ده حكم مصر 3 سنين بس ومهد لحكم إبنه العظيم رعمس التالت. رعمس التالت هو اللي منع الغزو الأوربي الأول لأفريقيا . خطورة اللي عمله جدنا العظيمتاريخيا ... حصل كتير إن الاوروبيين كانوا بيغزوا المناطق التانية بهدف الإحلال مش الإحتلال .. يعني كانوا بيهدفوا لإبادة السكان الأصليين والحياه على أرضهم مكانهم. عايز تعرف خطورة الموضوع ده .. يمكن مقارنته بإبادة الاوروبيين للسكان الأصليين .. حصل في كندا .. على يد الفايكنج معظم سكان أمريكا الأصليين .. على يد الأوروبيين عموما - حوالي 100 مليون من الهنود الحمر . سكان أستراليا الأصليين .. على يد الاوروبيين برضه , أعداد مهولة من شعب الكونجو .. على يد بلجيكا وكمان محاولتهم إبادة شعب جنوب أفريقيا لولا خوفهم من معرفة العالم باللي بيعملوه بعد زيادة الوعي وتطور الإعلام وحقوق الإنسان.دي عادة أوربية صميمة .. مش مجرد الإحتلال أو الإستعمار .. لكن أحيانا الإبادة الكاملة والإستيلاء على مقدرات الشعوب.الغزو الأوربي لشعوب البحر إستهدف مصر بعد إبادة الحيثيين والكنعانيين وبعدها الليبيين الأصليين وغيرهم .. لو كانوا نجحوا في إبادة المصريين كانت أفريقيا بقت مفتوحة أمامهم بدون مقاومة تذكر ..اللي عمله رعمس التالت بهزيمتهم في 3 معارك كبرى : جاهي - دلتا - بريري .. كان حاسم في منعهم من الدخول لعمق أفريقيا .. البعض بيقولوا إنه غير التاريخ ووقف الوجه الوحشي لإنهيار العصر البرونزي وغير مصير البشرية كلها .. وبكدة قدرت مصر تحمي أجناس أفريقيا من الإختفاء أو التضاؤل بشكل مخيف..دلوقتي عايزك تتخيل العالم من غير أفريقيا ... والأفارقة ... تماما زي مابقى خالي من الهنود الحمر تقريبا ..كمان عايزك لما تقرا عن مانديلا .. أو تتمتع بصوت أم كلثوم .. أو تذهل من اداء سيرينا وليامز أو محمد صلاح .. أو تتمتع بكتابات طه حسين .. أو تندهش من العبقرية الخارقة لأحمد زكي .. تدعي لجدك رعمس التالت .. اللي لولاه ماكانوش حيبقوا موجودين لأن أفريقيا كلها كان مصيرها حيبقى زي الهنود الحمر.
شريف السركي
صورة
صورة العضو الشخصية
doaa khairalla
عنوان العطاء المتميز
عنوان العطاء المتميز
 
مشاركات: 4456
اشترك في:
الثلاثاء أكتوبر 22, 2013 9:04 pm
  

العودة إلى المقالة الثقافية والفكرية

الموجودون الآن

المستخدمون المتصفحون لهذا المنتدى: لا يوجد أعضاء مسجلين متصلين و 1 زائر

cron